A Consellería de Política Territorial, Obras Públicas e Transportes, a través da Dirección Xeral de Urbanismo, ven de requirir ao Concello de Foz a que anule as 40 solicitudes de licencias municipais para a construción dunhas 1.350 vivendas que foron outorgadas pola Xunta de Goberno local o pasado 29 de marzo de 2006.


O requirimento, que foi remitido ao alcalde de Foz, o socialista José María García Rivera, pide a anulación das mesmas por “infrinxir o ordenamento xurídico vixente”, xa que estas foron aprobadas despois de que o Pleno do Concello acordara a suspensión de licencias co obxecto de iniciar os trámites para a redacción dun novo Plan Xeral de Ordenación Municipal. Estas licencias tampouco contan co informe xurídico que, neste caso, resultaba determinante para advertir á Xunta de Goberno local de que o acordo adoptado polo Pleno cinco días antes impedía a concesión das citadas licencias de construción.